Tarjuma e Kanzul Imaan wa Tafseer e Khazaain ul Irfaan #684

Tarjuma e Kanzul Imaan wa Tafseer e Khazaain ul Irfaan #684.

بسم الله الرحمن الرحيم
Assalatu Wassalamu Alayka Ya RasoolAllah ﷺ

▶Note-: Quraan e paak ke tarjume ko bagair wazu na chhue, Parh sakte hai.

Surah Aale Imran
Aayat No. 60 & 61

▶ Tarjuma - Allah ke naam se shuru jo bahut meharban Rehmat wala.
▶ Aye sunne wale yeh tere Rab ki taraf se haq hai to shaq waloñ mein na hona○
Phir aye mehboob jo tumse Isaa ke baarein mein hujjat kare baad iske ki tumhe ilm aa chuka to unse farma do aao hum bulaye apne bete aur tumhare bete apni auratein aur tumhari auratein aur apni jaane aur tumhari jaane phir mubahala kare to jhootoñ par Allah ki laanat daale.

▶ Tafseer
▶ Jabh Rasoole Kareem ﷺ ne nasaara e nazraan ko yeh Aayat padh kar sunayi aur mubahala ki daawat di to kehne lage hum gaur aur mashwara karle kal aap ko jawab denge jabh woh jamaa huwe to unhone apne sabse bade Aalim aur sahabe raaye shakhs Aaqib se kaha ki Aye Abdul Maseeh Aap ki kya raaye hai to usne kaha ki aye jamaate nasaara tum pehchaan chuke ki Muhammed (ﷺ) Nabi e Mursal to zaroor hai agar tumne unse mubahala kiya to sab halaaq ho jaoge abh agar nasraaniyat par qaayam rehna chahte ho to unhein chhordo aur ghar ko laut chalo yeh mashwara hone ke baad wo Rasoole Kareem ﷺ ki khidmat mein haazir huwe to unhone dekha ki Huzoor ﷺ ki godh mein Imaame Hussain hai aur daste mubarak meiñ Imaame Hasan ka haath aur Fatima aur Ali (رضي الله عنهم) Huzoor ﷺ ke piche hai aur Huzoor ﷺ un sabse farma rahe hai ki jabh maiñ dua karu to tum sab aameen kehna nazraan ke sabse bade nasraani Aalim (Paadri) ne jabh un hazraat ko dekha to kehne laga aye jamaate nasaara maiñ aise chehre dekh raha hu ki agar yeh log Allah se pahaad hataa dene ki dua kare to Allah Ta'ala pahaad ko jagah se hataa de inse mubahala na karna halaaq ho jaoge aur qayamat tak roo e zameeñ par koi nasraani baaki na rahega yeh sun kara nasaara ne Huzoor ﷺ ki khidmat mein arz kiya ki mubahala ki to hamari raaye nahi hai Aakhirkaar unhone jizaya dena manzoor kiya magar mubahala ke liye tayyar na huwe Sayyade Aalam ﷺ ne farmaya uski kasam jiske daste qudrat mein meri jaan hai nazraan waaloñ par azaab kareeb aa hi chuka tha agar woh mubahala karte to bandaroñ aur su'aroñ ki soorat mein maskh kar diye jaate aur jungle aag se bhadak uthta aur nazraan aur waha ke rehne wale parind tak nest wa naabud ho jaate aur ek saal ke arsa mein tamaam nasaara halaaq ho jaate.