Tamheed E Imaan By Imam Ahmed Raza Khan #16

بسم الله الرحمن الرحيم

Assalatu Wassalamu Alayka Ya RasoolAllah ﷺ

Book - TAMHEED E IMAAN by Imam Ahmed Raza Alaihir Rahma.

Abhi Qur'an o Hadees irshaad farma chuke hain ke Imaan ke haqeeqi wa waqai hone ko do baatein zaroor hain MUHAMMAD RASOOLALLAH ﷺ ki Taazeem aur MUHAMMAD RASOOLALLAH ﷺ ki Mohabbat ko tamaam Jahaan par taqdeem.

To iski aazmaish ka yeh sareeh tareeqa hai ke tumko jin logon se kaisi hi taazeem, kitni hi aqeedat, kitni hi dosti, kaisi hi Muhabbat ka ilaaqa ho Jaise Tumhare Baap, Tumhare ustad, Tumhare peer, Tumhari aulaad, Tumhare bhai, Tumhare ehbaab, Tumhare bade, Tumhare as-haab, Tumhare maulvi, Tumhare haafiz, Tumhare mufti, Tumhare waiz, wagaira wagaira kase baashad. Jab woh MUHAMMAD RASOOLALLAH ﷺ ki shaan mein gustaakhi karein aslan tumhare qalb mein unki azmat, unki muhabbat ka naam o Nishan rahe, fauran unse alag ho jao. Unko doodh se makkhi ki tarah nikaal kar phenk do, unki soorat, unke naam se nafrat khao. Phir na tum apne rishte ilaaqe dosti ulfat ka paas karo na uski maulviyat, mashikhat, buzurgi, Fazeelat ko khatre mein lao,ke aakhir yeh jo kuch tha MUHAMMAD RASOOLALLAH ﷺ hi ki gulami ki bina par tha. Jab yeh shakhs UNHI ki shaan mein gustaakh huwa phir hamein isse kya ilaaqa raha? 

Iske jubbe amaame par kya jayein, kya bohtere yahoodi jubbe Nahi pahente? Amaame Nahi baandhte? Iske naam wa Ilm, zaahiri fazl ko lekar kya karein? Kya bohtere paadri ba-kasrat falsafi, bade bade uloom o funoon nahi jaante? Aur agar ye nahi balke MUHAMMAD RASOOLALLAH ﷺ ke muqaabil tumne iski baat banaani chaahi (iski taraf se wakaalat ki) usne HUZOOR ﷺ se gustaakhi ki aur tumne usse dosti nibhaayi ya usey har bure se bad-tar bura na jaana ya usey bura kehne par bura Maana ya isi qadar ke tumne is amr ( kaam ) mein be-parwaahi manaayi ya Tumhare dil mein iski taraf se sakht nafrat na aayi to Lillaah ab Tumhi insaaf karlo ke tum Imaan ke imtehaan mein kahaan paas huwe. Qur'an o Hadees ne jis par husool-e-Imaan ka madaar rakha tha us se kitni door nikal gaye.