Tarjuma e Kanzul imaan wa Tafseer e Khazaain ul Irfaan #729

Tarjuma e Kanzul Imaan wa Tafseer e Khazaain ul Irfaan # 729.

بسم الله الرحمن الرحيم
Assalatu Wassalamu Alayka Ya RasoolAllah ﷺ

▶Note-: Quraan e paak ke tarjume ko bagair wazu na chhue, Parh sakte hai.

Surah Aale Imran
Paara No. - 04 Ruku - 03
Aayat No. 117.

▶ Tarjuma - Allah ke naam se shuru jo bahut meharban Rehmat wala.
1⃣ Kahawat uski jo is duniya ki zindagi mein
2⃣ Kharch karte hai Us hawa ki si hai jisme paala ho wo ek aisi qaum ki kheti par padi jo apna hi bura karte the to use bilkul maar gayi Aur Allah ne un par zulm na kiya haañ wo khud apni jaan par zulm karte hai

▶ Tafseer
1⃣ Mufassireen ka qaul hai ki isse Yahood ka wo kharch muraad hai jo Apne olma aur ru'saa par karte the ek qaul ye hai ki kuffar ke tamaam nafaqaat wa sadaqaat muraad hai ek qaul ye hai ki riyaakaar ka kharch karna muraad hai kyuñ ki un sab logo ka kharch karna ya nafa e duniyawi ke liye hoga ya nafa e ukhrawi ke liye agar mahaz nafa e duniyawi ke liye ho to aakhirat mein usse kya fayeda aur riyaakaar ko to aakhirat aur Raza e Ilahi maqsood hi nahi hoti uska amal dikhawe aur numood ke liye hota hai aise amal ka aakhirat mein kya nafa aur kaafir ke tamaam amal akaarat hai wo agar aakhirat ki niyyat se bhi kharch kare to nafa nahi paa sakta un logo ke liye wo misaal bilkul mutabiq hai jo aayat mein zikr farmayi jaati hai
2⃣ Yaani jis tarah ki barfaani hawa kheti ko barbaad kar deti hai usi tarah kufr infaaq ko baatil kar deta hai