Tarjuma e Kanzul Imaan wa Tafseer e Khazaain ul Irfan #733.

Tarjuma e Kanzul Imaan wa Tafseer e Khazaain ul Irfaan # 733.

بسم الله الرحمن الرحيم
Assalatu Wassalamu Alayka Ya RasoolAllah ﷺ

▶Note-: Quraan e paak ke tarjume ko bagair wazu na chhue, Parh sakte hai.

Surah Aale Imran
Paara No. - 04 Ruku - 04
Aayat No. 121

▶ Tarjuma - Allah ke naam se shuru jo bahut meharban Rehmat wala.
1⃣ Aur yaad karo Aye Mehboob jabh tum subah ko
2⃣ Apne daulatkhaane se bar aamad huwe musalmanoñ ko ladhaayi ke morcho par qayam karte Aur Allah sunta jaanta hai

▶ Tafseer
1⃣ Ba-maqqame Madeena Tayyaba Baqasde Uhad
2⃣ Jamhoor mufassireen ka ye qaul hai ki ye bayan junge uhad ka hai jiska ijmaali waaqiya ye hai ki Junge Badar mein shikast khaane se kuffar ko bada ranj tha isliye unhone baqasde inteqaam lashkar girañ murattab karke fauj kashi ki jabh Rasoole Kareem ﷺ ko khabar mili ki lashkare kuffar uhad mein utraa hai to Aapne as'haab se mashwara farmaya us mashurat mein Abdullah Bin Abi Bin Salul ko bhi bulaya gaya jo isse qabl kabhi kisi mashwarat ke liye bulaya na gaya tha aqsar Ansaar ki aur us Abdullah ki ye raaye huwi ke Huzoor ﷺ Madeena Tayyaba mein hi qaayam raheñ aur jabh kuffar yahan aaye tab unse muqabla kiya jaye yahi Sayyade Aalam ﷺ ki marzi thi lekin baaz as'haab ki ye raaye huwi ki Madeena Tayyaba se baahar nikal kar ladhna chahiye aur is par unhone israar kiya Sayyade Aalam ﷺ daulat saraa e aqdas mein tashreef le gaye aur asleeha zebe tan farma kar baahar tashreef laaye ab Huzoor ﷺ ko dekh kar un as'haab ko nadaamat huwi aur unhone arz kiya ki Huzoor ﷺ ko raaye dena aur us par israar karna hamari galti thi usko muaff farmaiye aur jo marzi e mubarak ho wahi kijiye Huzoor ﷺ ne farmaya Nabi ke liye sazawaar nahiñ thi ki hathiyar pehan kar qable jung utaar de mushrikeen uhad mein chahar shamba panj shamba ( Budh , Jumeraat ) ko pahuñche the aur Rasoole Kareem ﷺ Jumuah ke roz baad namaze Jumuah ek Ansaari ki namaze janaza padh kar rawana huwe aur 15 Shawwal san 3 Hijri roz yak shamba ( Itwaar ) Uhad mein pahuñche yaha nuzool farmaya aur pahaad ka ek darra jo lashkare Islaam ke piche tha usi taraf se andesha tha ki kisi waqt dushman pusht par se aakar hamla kare isliye Huzoor ﷺ ne Abdullah Bin Zubair رضي الله عنه ko 50 teerandaazo ke sath waha ma'moor farmaya ki agar dushman is taraf se hamla aawar ho to teer baari karke usko dafaa kar diya jaaye aur huqm diya ki kisi haal mein yahañ se na hatna aur is jagah ko na chhodna khwaah fatah ho ya shikast ho Abdullah Bin Ubay Bin Salul munafiq jisne Madeena Tayyaba mein reh kar jung karne ki raaye di thi apni raaye ke khilaaf kiye jaane ki wajah se barham huwa aur kehne laga ki Huzoor Sayyade Aalam ﷺ ne naw umr ladko ka kehna to maana aur meri baat ki parwaah na ki is Abdullah Bin Ubay ke saath 300 munafiq the unse usne kaha ki jabh dushman lashkare Islaam ke muqabil aajaye us waqt bhaag pado taaqi lashkare Islaam mein abtari ho jaye aur tumhe dekh kar aur log bhi bhaag nikle musalmanoñ ke lashkar ki kul taadaad ma'a un munafiqeen ke 1000 thi aur mushrikeen 3000 Muqabla hote hi Abdullah Bin Abi munafiq apne 300 munafiqoñ ko lekar bhaag nikla aur Huzoor ﷺ ke 700 As'haab Huzoor ﷺ ke saath reh gaye Allah Ta'ala ne unko saabit rakha yahañ tak ki mushrikeen ko hajimat huwiñ ab sahaba bhaagte huwe mushrikeen ke piche pad gaye aur Huzoor Sayyade Aalam ﷺ ne jahaañ qaayam rehne ke liye farmaya tha waha qaayam na rahe to Allah Ta'ala ne unhe dikha diya ki Badar mein Allah aur uske Rasool ki farmabardari ki barkat se fatah huwiñ thi yaha Huzoor ﷺ ke huqm ki mukhalifat ka nateeja ye huwa ki Allah Ta'ala ne mushrikeen ke diloñ se ro'abo haibat door farmayi aur wo palat pade aur musalmanoñ ko hajimat huwi Rasoole Kareem ﷺ ke saath ek jamaat rahi jisme Hazrate Abu Bakr , wa Ali , wa Abbas , wa Talha , wa Sa'ad رضي الله عنهم the isi jung mein dandaane aqdas shaheed huwe aur chehra e aqdas par zakhm aaya isi ke muta'alliq ye aayate kareema naazil huwi