Tarjuma e Kanzul Imaan wa Tafseer e Khazaain ul Irfaan #548

Tarjuma e Kanzul Imaan wa Tafseer e Khazaain ul Irfaan #548.

بسم الله الرحمن الرحيم
Assalatu Wassalamu Alayka Ya RasoolAllahﷺ

▶Note-: Quraan e paak ke tarjume ko bagair wazu na chhue, Parh sakte hai.

Surah Baqrah Shareef
Aayat No. 226 & 227.

▶ Tarjuma - Allah ke naam se shuru jo bahut meharban Rehmat wala.
▶ Woh jo kasam kha baithte hai aur apni auratoñ ke paas jaane ki unhein chaar mahine ki mohlat hai pas agar is muddat mein phir aaye to Allah bakhshne wala meherbaan hai. Aur Agar chhodh dene ka iraada pakka kar liya to Allah Sunta jaanta hai.

▶ Tafseer
▶ Shaane Nuzool zamana e jahiliyat mein logoñ ka yeh mamool tha ki apni auraton se maal talab karte agar woh dene se inkaar karti to ek saal do saal teen saal ya usse zyada arsa unke paas na jaane aur sohbat tarq karne ki kasam kha lete the aur unhe pareshani mein chhordh dete the na wo bewa thi ki kahi apna thikana kar leti na shohardaar ki shohar se aaram paati Islam ne is zulm ko mitaya aur aisi kasam khane waloñ ke liye chaar mahine ki muddat muay'yan farma di ki agar aurat se chaar mahine ya usse zayad arsa ke liye ya gair muay'yan muddat ke liye tarq e sohbat ki kasam kha le jisko ilaa kehte hai to iske liye chaar maah intezaar ki mohlat hai is arsaa mein khoob soch samajh le ki aurat ko chhordhna uske liye behtar hai ya rakhna agar rakhna behtar samjhe aur is muddat ke andar rujoo kare to Nikah baaki rahega aur kasam ka kaffara laazim hoga aur agar is muddat mein rujoo na kiya aur kasam na todi to aurat nikah se baahar ho gayi aur us par talaak e baayeen waaqe ho gayi.
▶ Masla – Agar mard sohbat par qaadir ho to rujoo sohbat se hi hoga aur agar kisi wajah se qudrat na ho to baad qudrat sohbat ka waada rujoo hai. (#Tafseer Ahemadi)