Tarjuma e Kanzul Imaan wa Tafseer e Khazaain ul Irfaan #569

Tarjuma e Kanzul Imaan wa Tafseer e Khazaain ul Irfaan #569.

بسم الله الرحمن الرحيم
Assalatu Wassalamu Alayka Ya RasoolAllahﷺ

▶Note-: Quraan e paak ke tarjume ko bagair wazu na chhue, Parh sakte hai.

Surah Baqrah Shareef
Aayat No. 244 & 245.

▶ Tarjuma - Allah ke naam se shuru jo bahut meharban Rehmat wala.
1⃣ Aur lado Allah ki raah mein.
2⃣ Aur jaan lo ki Allah sunta jaanta hai koi jo Allah ko karze hasan de.
3⃣ To Allah uske liya bahot guna badha de aur Allah tangi aur kashayeesh karta hai aur tumhe usi ki taraf phir jaana.

▶ Tafseer
1⃣ Aur Maut se na bhaago jaisa Bani Israeel bhaage the kyuki maut se bhaagna kaam nahi aata.
2⃣ Yaani raahe Khuda mein ikhlaas ke saath kharch kare raahe Khuda mein kharch karne ko karz se Ta'abeer farmaya yeh kamale lutf wa karam hai banda uska banaya huwa aur bande ka maal uska ataa farmaya huwa Hakeeki maalik woh aur Banda uski ataa se mazaji milk rakhta hai magar karz se ta'abeer farmane mein yeh dil nasheen karna manzoor hai ki jis tarah karz dene wala itminan rakhta hai ki uska maal zaaya nahi huwa woh uski wapasi ka mustahiq hai aisa hi Raahe Khuda mein kharch karne wale ko itminaan rakhna chahiye ki woh is infaaq ki jazaa bil yakeen payega aur bahot zyada paayega.
3⃣ Jiske liye chaahe rozi tang kare jiske liye chaahe wasee farmaye tangi wa farakhi uske kabza mein hai aur woh apni raah mein karch karne wale se wus'at ka waada karta hai.