Tarjuma e Kanzul imaan wa Tafseer e Khazaain ul Irfaan #695

Tarjuma e Kanzul Imaan wa Tafseer e Khazaain ul Irfaan #695.

بسم الله الرحمن رحيم

Assalatu Wassalamu Alayka Ya RasoolAllah ﷺ

▶Note-: Quraan e paak ke tarjume ko bagair wazu na chhue, Parh sakte hai.

Surah Aale Imran

Paara No. - 04 Ruku - 01

Aayat No. 75

▶ Tarjuma - Allah ke naam se shuru jo bahut meharban Rehmat wala.

1⃣ Aur kitabiyoñ mein koi woh hai ki agar tu uske paas ek dher amaanat rakhe to woh tujhe adaa kar dega.

2⃣ Aur unme koi woh hai ki agar ek ashrafi uske paas amaanat rakhe to woh tujhe pher kar na dega magar jabh tak tu uske sar par khada rahe.

3⃣ Yeh isliye ki woh kehte hai ki anpadho.

4⃣ Ke mu'aamla mein hum par koi mu'aakhja nahi aur Allah par jaan bujh kar jhoot baadhte hai.

▶ Tafseer 

1⃣ Shaane nuzool yeh Aayat ahle kitaab ke haq mein naazil huwi aur isme zaahir farmaya gaya ki unme do qism ke log hai Ameen wa Khaaeen, baaz to aise hai ki kaseer maal unke paas amaanat rakha jaaye to be kamo kaast waqt par adaa kar de jaise Hazrat Abdullah Bin Salaam jinke paas ek Quraishi ne 1200 Aukiya sona amaanat rakha tha aapne usko waisa hi adaa kiya aur baaz ahle kitaab itne bad-diyanat hai ki thode par bhi unki niyyat bigad jaati hai jaise Fasaakh Bin Aazora jiske paas kisi ne ek ashrafi amaanat rakhi thi maangte waqt usse muqar gaya.

2⃣ Aur jabh hi dene wala uske paas se hate woh maale amaanat hazam kar jaata hai.

3⃣ Yaani gair kitabiyoñ.

4⃣ Ki usne apni kitaboñ mein doosre deen waaloñ ke maal ko hazam kar jaane ka hukm diya hai bawajood ki woh khoob jaante hai unki kitaabo mein koi aisa hukm nahi.